Müğənni Röya: “Samirlə Elnurun başına gələnlərdən sonra “Eurovision” haqda düşünmürəm”

Sənətçi ingiliscə mahnı oxumağı problem saymır

Müğənni Röya “Eurovision” mahnı müsabiqəsində iştirak etmək barədə düşünmür. O, Lent.az-a açıqlamasında müsabiqədə iştirakın çətin olmadığını deyib: “Əslində, bu müsabiqəyə marağım yoxdu. Gedənlər guya qeyri-adi istedadlar deyil ki! Bir mahnını ingiliscə oxumaq da mənim üçün problem deyil. Beş dəqiqəlik mahnıdır da, nə var ki...”

Röya ötən il müsabiqədə Azərbaycanı təmsil edən Samir Cavadzadə və Elnur Hüseynovun vətənə döndükdən sonra haqsızlıqla üzləşdiyini iddia edir. Məhz bu səbəbdən də heç vaxt “Eurovision”da iştirak etməməyi qərara alıb: “Bəlkə də nə vaxtsa getmək istərdim, amma Samirlə Elnurun başına gələnlərdən sonra heç vaxt! Çox şeylər baş verib, o qədər danışıqlar oldu ki! Bəyəm Samir pis müğənni idi? O da Azərbaycanda tanınan müğənni idi, Elnura dəstək üçün duet oxumuşdu. Samirlə Elnurun ifası uğursuz olsaydı, indi onları daş-qalaq eləmişdilər...”

Lalə Yusifqızı