Bakıda tanınmış fitnes zalının sahibini bıçaqlayan 5 nəfər tutuldu - YENİLƏNİB

Bakıda fitnes müəlliminin bıçaqlanması ilə bağlı 5 nəfər saxlanılıb.

DİN-in mətbuat xidmətindən Lent.az-a bildirilib ki, oktyabrın 21-də saat 3 radələrində paytaxtın Xətai rayonu ərazisində yerləşən restoranların birində 24 yaşlı qadının döyülməsi, 40 yaşlı Ş.Mustafayevə və 30 yaşlı F.İsmayılova kəsici alətlə xəsarətlər yetirilməsi barədə polis məlumat daxil olub.

Polis əməkdaşlarının keçirdikləri tədbirlərlə əməli törətməkdə şübhəli bilinən, biri əvvəllər məhkum olunmuş şəxs olmaqla 5 nəfər müəyyən olunaraq saxlanılıb.

Araşdırma aparılır.

***

21 oktyabr, saat 08:14

Bakının Xətai rayonunda bıçaqlanma hadisəsi qeydə alınıb.

Lent.az xəbər verir ki, hadisə Ağ Şəhər Yaşıl ada küçəsində yerləşən “Pubar” iaşə obyektində qeydə alınıb.

Belə ki, 1994-cü il təvəllüdlü İsmayılov Fərid Vahid oğlu sözügedən obyektdə idman dərsi keçdiyi tələbəsinin döyüldüyü üçün qarşı tərəfə iradını bildirib.

Hələlik naməlum şəxs F.İsmayılovun əvvəlcə başına şüşə butulkanı çırpıb. Daha sonra bıçaqla ona xəsarət yetirilib. Ağır xəsarətlər alan F.İsmayılov Kliniki Tibbi Mərkəzə yerləşdirilib.

Xəstə yerləşdirildiyi tibb müəssisəsində əməliyyat edilib. Həkimlər onun nəziyyətini stabil olaraq qiymətləndirirlər.

Qeyd edək ki, Fərid İsmayılov uzun müddətdir ki, müxtəlif idman zallarında idman təlimçisi kimi işləyir. Nərimanov rayonunda onun özünə məxsus “Lux” idman zalı var.