DəmirBank yeni korporativ tərtibatda Mərkəz filialının açılışını keçirdi

Ümummilli Lider Heydər Əliyevin doğum günündə onun xatirəsinə həsr edilən açılış mərasimində Bankın İdarə Heyətinin Sədri Roman Əmircanov, filialın müdiri və müştəriləri çıxış ediblər. Tədbirdə Azərbaycanın müstəqilliyinin qorunması və güclənməsində, ölkənin inkişafında və dünya dövlətləri sırasında layiqli yer tutmasında Ümummilli Lider Heydər Əliyevin misilsiz fəaliyyəti vurğulanıb. Dahi şəxsiyyətin strateji kursu və cənab Prezident İlham Əliyevin rəhbərliyi ilə ölkə iqtisadiyyatının və bank sektorunun sürətli inkişafı qeyd edilib.

DəmirBank filial şəbəkəsinin inkişafı üçün bir çox işlər həyata keçirir. Bankın rebrendinqi ilə bağlı 2010-cu ildə Bankın brend kitabı hazırlanıb və bütün filiallarda rebrendinq işləri həyata keçirilib. Bu işlərlə yanaşı 2010-cu ildə DəmirBank-ın “Korporativ interyer dizayn Standartları” hazırlanıb və filiallarda yeni interyer tərtibat standartları tətbiq edilməkdədir.

Bankın yeni korporativ interyer standartları Revolution Design şirkəti tərəfindən müasir üslubda hazırlanıb. Yeni tərtibat dizaynında müştərilərin və işçilərin rahat yerləşməsi, ümumi sahənin səmərəli istifadəsi, bununla yanaşı məkanın mümkün qədər geniş görünməsi kimi məqamlar nəzərə alınıb. İstifadə olunan rənglər açıq tonlarda olduğundan filialın vizual olaraq geniş və işıqlı görünməsinə də kömək edir.

DəmirBank-ın hazırda Mərkəz, Bakıxanov, Qazax və Qusar filialları yeni interyer tərtibat qaydalarına uyğun təmir edilmiş ofislərdə fəaliyyət göstərir. Bankın bir sıra filialları müştərilər üçün daha rahat və geniş ofislərə köçürülmüşdür. Bankın daha bir neçə filialının da qəbul edilmiş korporativ tərtibat standartlarına əsasən hazırlanmış yeni ofislərə köçürülməsi işləri aparılır.

DəmirBank ölkə üzrə 30 filiala malikdir ki, bunlardan 13 filial Bakıda, 17-si isə regionlarda yerləşir.