“28 May” metrostansiyasında ikinci çıxış tikilir

Digər təkçıxışlı stansiyalarda ikinci çıxışların tikintisi yalnız maliyyə vəsaitindən asılıdır

Bakı Metropoliteninin “28 May” stansiyasının ikinci çıxışının tikintisi yaxın iki ay ərzində başa çatdırılacaq. İlin sonunda isə çıxışın istifadəyə verilməsi nəzərdə tutulur.

Bakı Metropolitenindən Lent.az-a bildiriblər ki, yeni çıxış Rus Pravoslav Kilsəsinin arxa hissəsində, yəni Mikayıl Rəfili küçəsi ilə “Azadlıq” prospektinin kəsişdiyi əraziyə açılacaq. İkinci çıxışdakı keçidin ümumi uzunluğu 170 metrdir. Artıq girişin vestibülündə mərmər və qranit işləri tamamlanıb, hazırda stansiyanın ətrafında yenidənqurma işləri aparılır.

Bakı Metropolitenində bildirirlər ki, 1 çıxışlı stansiyalar rahat gediş-gəliş və sərnişinlərin təhlükəsizlik nöqteyi-nəzərdən normal sayılmır. Metronun “İçərişəhər”, “Elmlər Akademiyası”, “Sahil”, “Nizami” məhz belə stansiyalardan hesab olunur.

Bununla belə, həmin stansiyaların hər birinin ikinci çıxışının layihələri hazırdır. Belə ki, “Elmlər Akademiyası” stansiyasının ikinci çıxışı Bakı Dövlət Universitetinin həyətinə, “Nizami”nin çıxışı Azərbaycan Dövlət Akademik Dram Teatrının qarşısına, “Sahil” Nəsiminin heykəlinin qarşısına, “İçərişəhər”in çıxışı isə Dənizkənarı Milli Parkadır. Bakı Metropolitenində deyirlər ki, təkçıxışlı stansiyalarda ikinci çıxışların tikintisi yalnız maliyyə vəsaitlərindən asılıdır.

Elxan SALAHOV