“Mançester Yunayted”dən qovulduğuna görə 20 milyon alacaq

Xəbər verildiyi kimi, "Mançester Yunayted" 2022-ci ilin yayından kluba rəhbərlik edən baş məşqçi Erik ten Haqı istefaya göndərib.

Daimi baş məşqçi təyin olunana qədər komandanı müvəqqəti olaraq Ruud van Nistelrooy idarə edəcək. Van Nistelroy 2024-cü ilin iyulunda Haaqın məşqçi heyətinə qoşuldu. Ruud əvvəllər PSV Eyndhoven klubuna rəhbərlik edib və Hollandiya millisində baş məşqçinin köməkçisi olub.

Lent.az bildirir ki, "The Athletic"in yazdığına görə, "Mançester Yunayted" hollandiyalı mütəxəssisə müqaviləni vaxtından əvvəl pozduğu üçün təxminən 20 milyon funt-sterlinq ödəyəcək.

54 yaşlı Ten Haq 2022-ci ilin iyununda "Mançester Yunayted"i çalışdırırdı. İlk ilində ten Haq klubla İngiltərə Liqa Kubokunu, keçən mövsüm isə İngiltərə Kubokunu qazanıb. Bununla belə, “Mançester Yunayted” ötən mövsümü səkkizinci yerdə başa vurub ki, bu da klubun 21-ci əsrdəki ən pis nəticəsi idi.

Oktyabrın 27-də "Mançester Yunayted" səfərdə "Vest Hem"lə qarşılaşmada ikinci hissənin əlavə vaxtında qol buraxaraq məğlub olub. 9 turdan sonra "qırmızı şeytanlar" İngiltərə Premyer Liqasının turnir cədvəlində 11 xalla 14-cü pillədə qərarlaşıb. Çempionatda lider Mançesterin digər klubu - "Mançester Siti"dir. Pep Qvardiolanın yetirmələri 23 xalla "Liverpul"u 1 xal qabaqlayır.