Ermənistan yığması başsız qaldı

Serj Sarkisyanın izlədiyi görüşdən sonra yığmanın baş məşqçisi qovuldu

Futbol üzrə Ermənistan milli komandasının baş məşqçisi Yan Poulsen istefaya göndərilib.

Lent.az-ın məlumatına görə, bu haqda qərar Ermənistan Futbol Federasiyasının prezidenti Ruben Ayrapetyanla danimarkalı mütəxəssis arasında keçirilmiş görüşdən sonra qəbul edilib.

Bununla belə, 63 yaşlı Poulsenə federasiyada texniki direktor vəzifəsi təklif olunub. Yığmanın baş məşqçi postu isə müvəqqəti olaraq, onun köməkçisi Vardan Minasyana həvalə edilib.

Qeyd edək ki, Poulsen 2008-ci ilin yanvarında Ermənistan millisinin baş məşqçisi təyin olunub. Onun rəhbərliyi altında ermənilər 2010-cu il dünya çempionatının seçmə qrup mərhələsində ilk dörd matçda Türkiyə, İspaniya, Belçika, Bosniya və Herseqovinaya uduzublar. Yalnız martın 28-də İrəvanda keçirilmiş qarşılaşmada Estoniya ilə 2:2 hesablı heç-heçə qeydə alınıb. Ermənistan prezidenti Serj Sarkisyanın da tribunadan izlədiyi görüşdən sonra Poulsen istefaya göndərilib.