Xan maşınını oğurlamaq istəyən 6 qarətçini çırpdı

İngiltərənin Bolton şəhərində yüngül çəkidə boks üzrə sabiq dünya çempionu Əmir Xan öz əmlakını 6 oğrudan qorumağı bacarıb. Lent.az-ın “The Sun”a istinadən verdiyi məlumata görə, Xan avtomobilini qaçırmağa çalışan qarətçiləri döyüb.

İnsident gecə klubundan qayıdarkən boksçu ilə qardaşı Harun “Range Rover”ə oturduqları vaxt baş verib. Bu zaman onların qarşısını bir maşın kəsib. Avtomobildən 6 kişi çıxıb. Onlar Xanın 100 min funt sterlinq dəyərində olan əmlakına yiyələnmək istəyiblər. Qarətçilərdən biri boksçunun sifətinə zərbə endirib, əvəzində özü nokauta düşüb. Qalanları da davaya qoşulub, amma qardaşlar cavabında hamısını yerə səriblər. Şahidlər deyirlər ki, Əmir və Harun yol verilən özünümüdafiə tədbirləri çərçivəsində hərəkət ediblər.

Hadisə yerinə polis çağırılsa da, şikayətçi olmayıb.