Sürücülərə vacib xəbərdarlıq: Bəzi yollar təhlükəlidir

Martın 30-na keçən gecə Respublikanın rayonlarına və bu gün gündüz saatlarında Bakıya yağan qar yollarda sürüşkənlik və bəzi yerlərdə buzlaşma yaradıb. Lent.az-ın məlumatına görə, məsələ ilə bağlı Nəqliyyatı İntellektual İdarəetmə Mərkəzi sürücülərə müraciət edib. Mərkəzdən bildirilib ki, yolların sürükşən olması ilə əlaqədar sürücülərə daha ehtiyatlı olmaları və ara məsafəsini gözləmələri tövsiyə olunur.

Bu arada Baş Dövlət Yol Polisi İdarəsindən Lent.az-a bildirilib ki, Bakı-Şamaxı-Muğanlı-İsmayıllı və Bakı-Quba-Rusiya sərhədi magistrallarında buzlaşma var. Sürücülər bu istiqamətdə hərəkətdə olarkən diqqətli olmalıdırlar. Ölkənin digər yollarında da sürüşkənlik müşahidə olunur.

Qeyd edək ki, sürücülər belə hava şəraitində sürət həddinə diqqət yetirməli və xüsusi ilə enişli-yoxuşlu yollarda ehtiyatlı olmalıdırlar. Artıq sürüşkən yollarda bir neçə yol qəzasının baş verdiyi də bildirilir.