Bakıda zəncirvarı qəza: sürücü ağır yaralanıb - YENİLƏNİB

Binəqədi rayonu, Azadlıq prospektində sürücünün ağır yaralanması ilə nəticələnən zəncirvarı qəza baş verib.

APA-nın xəbərinə görə, işıqforun qırmızı işığına məhəl qoymayan "90 XB 061" dövlət nömrə nişanlı "VAZ 2107" markalı avtomobil "10 OF 282" nömrəli "Mercedes"lə toqquşub. Toqquşmanın təsiri güclü olduğundan hər iki avtomobil yol kənarında dayanan daha iki avtomobilə çırpılıb. Hadisə nəticəsində "VAZ 2107"nin sürücüsü ağır xəsarət alıb. O, təcili yardım vasitəsi ilə 1 saylı şəhər klinik xəstəxanasına çatdırılıb.

Qəza ilə bağlı Azadlıq prospektində tıxac meydana gəlib. Dövlət Yol Polisinin Binəqədi Rayon Şöbəsinin əməkdaşları yararsız hala düşən avtomobilləri evakuatorlar vasitəsi ilə ərazidən uzaqlaşdırdıqdan sonra prospektdə nəqliyyatın hərəkəti normallaşıb.

Faktla yol polisinin Binəqədi Rayon Şöbəsində araşdırma aparılır.