Kadrlar şöbəsinin rəisi öldürülüb - YENİLƏNİB

Fevralın 7-də Yevlax rayonu ərazisində törədilmiş qətlin bəzi məqamları məlum olub. Lent.az-ın Daxili İşlər Nazirliyinin mətbuat xidmətinə istinadən verdiyi məlumata görə, "Fərid" inşaat tikinti şirkəti tərəfindən tikintisi aparılan xəstəxananın yardımçı otağında, şirkətin kadrlar şöbəsinin rəisi Bakı şəhər sakini Müzəffər Rüstəmzadənin küt alətlə qətlə yetirilmiş meyiti tapılıb. İlkin yoxlama prokurorluq, əməliyyat-axtarış tədbirləri Yevlax RPŞ tərəfindən aparılır.

10:28

****

Yevlax rayonunda dəhşətli qətl hadisəsi törədilib. Rayon Polis Şöbəsindən Lent.az-a verilən məlumata görə, Yevlax şəhəri ərazisində 1951-ci il təvəllüdlü Rüstəmzadə Müzəffər İsmayıl oğlu küt alətlə qətlə yetirilib. Baş və bədəninin müxtəlif nahiyələrində ağır xəsarətlər alan 62 yaşlı M.Rüstəmzadə xəstəxanaya çatdırılsa da ölüb.

Lent.az-ın əldə etdiyi digər məlumata görə, qətlə yetirilmiş M.Rüstəmzadə Yevlax rayon Mərkəzi Xəstəxanasında işləyir. Onun kim tərəfindən, nə səbəbdən və hansı şəraitdə qətlə yetirilməsi hələlik məlum deyil. Hadisəni törədən şəxs və ya şəxslərin yaxalanaraq istintaqa təhvil verilməsi istiqamətində iş aparılır.

Əməliyyat-axtarış tədbirləri davam etdirilir.