Ölüm olan klinikada YOXLAMA: Həkim qanunsuz işləyirmiş - YENİLƏNİB

Səhiyyə Nazirliyi Analitik Ekspertiza Mərkəzi “Mərcan” klinikasında ölüm faktından sonra aparılmış plandankənar yoxlamanın nəticələrini açıqlayıb.

Lent.az xəbər verir ki, nazirliyin tapşırığı əsasında Analitik Ekspertiza Mərkəzində işçi qrup yaradılıb və “Mərcan” klinikasında plandankənar yoxlama həyata keçirilib.

Mərkəzdən bildirilib ki, daha əvvəl keçirilmiş yoxlamalar zamanı aşkar olunmuş qanun pozuntuları səbəbindən “Mərcan” klinikasının cərrahiyyə əməliyyatları aparmaq hüququ dayandırılıb, yəni lisenziyasının fəaliyyəti məhdudlaşdırılıb. Lakin buna baxmayaraq, plandankənar yoxlama zamanı klinikada cərrahiyyə əməliyyatlarının icrasının davam etdirildiyi müəyyən edilib.

Aşkarlanmış faktla bağlı Analitik Ekspertiza Mərkəzi tərəfindən İnzibati Xətalar Məcəlləsinin 215.1-ci maddəsinə əsasən protokol tərtib edilərək aidiyyəti üzrə hüquqi tədbirlərin görülməsi üçün təqdim olunub.

İXM-in 215.1-ci maddəsinə əsasən, lisenziyada nəzərdə tutulmayan tibb fəaliyyətinin həyata keçirilməsinə görə:

– fiziki şəxslər 300 manatdan 500 manatadək,

– vəzifəli şəxslər 800 manatdan 1000 manatadək,

– hüquqi şəxslər isə 6000 manatdan 8000 manatadək məbləğdə cərimə edilə bilər.

Bundan əlavə, yoxlama zamanı həkim Nigar Məhəmmədovanın müvafiq sertifikasiyadan keçmədən plastik cərrah fəaliyyəti göstərdiyi faktı da aşkar edilib. Bu fakta görə İnzibati Xətalar Məcəlləsinin 215.4-cü maddəsi ilə protokol tərtib olunub və müvafiq orqanlara təqdim edilib.

İXM-in 215.4-cü maddəsinə əsasən, sertifikasiyadan keçməyən şəxslərin praktik tibb və ya əczaçılıq fəaliyyətinə buraxılmasına görə:

– vəzifəli şəxslər 800 manatdan 1000 manatadək,

– hüquqi şəxslər isə 6000 manatdan 8000 manatadək məbləğdə cərimə edilə bilər.

Məlumatda qeyd olunub ki, həmin ölüm faktı hüquq-mühafizə orqanlarının araşdırma səlahiyyətindədir və bu məsələ müvafiq qaydada həmin qurumlar tərəfindən araşdırılır.

Qeyd edək ki, Rusiya vətəndaşı olan 37 yaşlı Arzu Sadıqova “Mərcan” klinikasında ümumi cərrah Nigar Məmmədova tərəfindən icra olunan abdominoplastika və liposaksiya əməliyyatından sonra ölüb.

***

12:28

Rusiya vətəndaşı olan qadın Bakıda özəl klinikaların birində abdominoplastika və liposaksiya əməliyyatından sonra ölüb.

Lent.az xəbər verir ki, bu barədə Xəzər TV süjet hazırlayıb.

Hadisənin iyunun 11-i “Mərcan” klinikasında ümumi cərrah Nigar Məmmədova tərəfindən icra olunan əməliyyat nəticəsində baş verdiyi bildirilib. Vəfat edən 37 yaşlı Arzu Sadıqovanın ailəsi onun ölümündə həkimi günahlandırıb.

Mərhumun anasının iddialarına görə, övladının liposaksiya əməliyyatı etdirmək niyyəti olmayıb: “Onu bu əməliyyata cərrah Nigar Məmmədova təhrik edib. Eyni zamanda bu həkim qızımı prosesə hazırlıqsız götürüb”.

A.Sadıqovanın dayısı isə bildirib ki, mərhum Rusiya vətəndaşı olub, anası ilə Bakıya istirahətə gəlibmiş.

Məsələ ilə bağlı həkim Nigar Məmmədova isə bildirib ki, Arzu Sadıqova üzərində həyata keçirilən “qarın ağ xəttinin böyük ölçülü yırtığına görə aparılmış herinotomiya və herniplastika, həmçinin abdominoplastika” əməliyatından sonra pasiyentdə tibbdə tanınan ağırlaşma - emboliya halı müşahidə olunub: “Bütün tibbi müdaxilələrə baxmayaraq, onun həyatını xilas etmək mümkün olmayıb. Əməliyyat müvafiq tibbi protokollara uyğun şəkildə icra edilib. Hadisənin dəqiq səbəbləri aparılacaq müvafiq ekspertizadan sonra tam müəyyən olunacaq”.

Sözügedən klinikadan isə qeyd olunub ki, ekspertiza rəyi açıqlandıqdan sonra məlumat veriləcək.