Ali Məhkəmə soyadını dəyişmək istəyən erməninin şikayətini təmin etmədi

Azərbaycan Ali Məhkəməsində Bakı şəhər sakini Aruşanyan Sevinc Vyaçeslavovnanın Bakı Apelyasiya Məhkəməsinin qərarından verdiyi kassasiya şikayətinə baxılıb. Lent.az-ın xəbərinə görə, hakim Günəş Xudaverdiyevanın sədrliyilə keçirilən prosesin sonunda Mülki işlər üzrə məhkəmə kollegiyası S.Aruşanyanın kassasiya şikayətini təmin etməyib.
Qeyd edək ki, Sevinc Aruşanyan milliyətcə erməni olan atasının soyadını daşıyır. O, 4 il öncə soyadının dəyişdirilməsi üçün Suraxanı rayon Məhkəməsinə müraciət edib.

S.Aruşanyan məhkəmədən milliyətcə azərbaycanlı olan anasının soyadına keçilməsi barədə qərar qəbul etməsini xahiş edib. Rayon məhkəməsi isə onun bu iddiasını təmin etməyib. S.Aruşanyan məhkəmənin bu qərarından qanunvericilikdə nəzərdə tutulmuş müddətdə apelyasiya şikayəti verməyib. Qərardan bir neçə il keçdikdən sonra isə adıçəkilən şəxs apelyasiya şikayəti etmək üçün rayon məhkəməsindən ərizə tələb edib. Suraxanı rayon Məhkəməsi isə apelyasiya şikayətinin verilməsi üçün müddətin bitdiyini əsas gətirərək, onun bu istəyini həyata keçirməyib. Bundan sonra Sevinc Aruşanyan apelyasiya şikayəti verib.

Bakı Apelyasiya Məhkəməsi bu il martın 19-da onun iddiasını təmin etməyib. Bu səbəbdən də o, Ali Məhkəməyə müraciət edib.

Pərvin ABBASOV