Bakı İstintaq Təcridxanası yaxınlarda istifadəyə veriləcək

Ədliyyə Nazirliyi Penitensiar Xidmətinin Naxçıvanda yeni tikilən Qarışıq Rejimli Cəzaçəkmə Müəssisəsinə məhkumların köçürülmə prosesi tam başa çatmayıb.

APA-nın məlumatına görə, Penitensiar Xidmətin rəis müavini Hüseyn Əlixanov jurnalistlərə açıqlamasında deyib ki, məhkumların Naxçıvanda yeni istifadəyə verilən cəzaçəkmə müəssisəsinə köçürülmənin tam yekunlaşmaması texniki səbəblərlə bağlıdır: “Müəssisə artıq hazırdır. Məhkumların həmin müəssisəyə köçürülməsi ilə bağlı layihə də hazırlanıb. Bəzi məhkumlar Naxçıvana köçürülmələrini istəmirlər. Əlbəttə hansı məhkum Naxçıvan sakinidirsə ilk növbədə həmin müəssisəyə onun köçürülməsi nəzərdə tutulub”.

H. Əlixanov Kürdəxanıda yerləşən Bakı İstintaq Təcridxanasının da bu yaxınlarda istifadəyə veriləcəyini deyib.
Qeyd edək ki, Naxçıvanda Ədliyyə Nazirliyi Penitensiar Xidmətinin yeni tikilən Qarışıq Rejimli Cəzaçəkmə Müəssisəsinin 2008-ci ildə açılışı keçirilib.