Rusiyada öldürülmüş 22 yaşlı qız Bakıda dəfn olundu

Mərhumun atası dəfnə gələ bilməyib

Rusiyanın Sankt-Peterburq şəhərində atası Qafar Kərimov tərəfindən qətlə yetirildiyi deyilən 1988-ci il təvəllüdlü Rumiyyə Kərimova bu gün Bakıda dəfn olunub. Lent.az-ın müxbiri xəbər verir ki, R.Kərimovanın cənazəsi təyyarə ilə Bakıya saat 14.00 radələrində gətirilib. O, “NZS” qəsəbəsində – baba və nənəsinin dəfn edildiyi qəbiristanlıqda torpağa tapşırılıb.

Mərhumun yaxınları Lent.az-ın əməkdaşı ilə söhbətində Rusiya mətbuatının yazdıqlarının əksinə olaraq, R.Kərimovanın açıq-saçıq geyindiyinə görə atası tərəfindən öldürdülməsi fikrini qəti şəkildə rədd ediblər: “O, nümunəvi tələbə olub. Pavlov adına Tibb Universitetində təhsil alırdı. Atasını “vurmaq” məqsədilə qızından istifadə olunmaqla iyrənc hərəkətə əl atılıb”.

Dəfn mərasimində mərhumun anası da iştirak edib. Lakin atası Q.Kərimovdan Sankt-Peterburqu tərk etməmək barədə iltizam alındığından o, dəfn mərasiminə qatıla bilməyib.

Pərvin ABBASOV