İmamoğlunun diplomu universitetin məlumat bazasından silindi

İstanbul Universiteti korrupsiya və Türkiyədə terror təşkilatı sayılan Kürdüstan Fəhlə Partiyasına yardım ittihamı ilə həbs edilən İstanbul bələdiyyə başqanı Əkrəm İmamoğlunun diplomunu öz məlumat bazasından çıxarıb.

Lent.az xəbər verir ki, bu barədə “Sabah” qəzeti məlumat yayıb.

Siyasətçinin ali təhsil diplomu haqqında məlumat axtarışı zamanı, universitetin məlumat bazası yalnız orta məktəbi bitirmə şəhadətnaməsi haqqında məlumat verir.

Türkiyə konstitusiyasına görə, prezidentliyə yalnız ali təhsil diplomu almış vətəndaşlar namizəd ola bilər. Sənədin silinməsi ilə əlaqədar İmamoğlu dövlət başçısı postuna namizəd kimi qeydiyyatdan keçə bilməyəcək.

Martın 23-də məhkəmə İmamoğlunu həbs edib. O, Türkiyənin hazırkı rəhbəri Rəcəb Ərdoğanın əsas siyasi rəqibidir və müxalifət tərəfindən prezident seçkilərində gələcək namizəd kimi qiymətləndirilib. Onun həbsindən sonra İstanbul və digər şəhərlərdə genişmiqyaslı etiraz aksiyaları keçirilib. Polis nümayişçilərə qarşı su şırnaqlarından və qazdan istifadə edib.