Prezident Medvedev yol hərəkəti qaydasını pozmaqda ittiham olunur

Təhlükəsizlik kəmərini bağlamayan “sürücü” barəsində şikayət verildi

Rusiyanın Yekaterinburq şəhərinin sakini ölkə prezidenti Dmitri Medvedevdən Dövlət Yol Hərəkətinin Təhlükəsizliyi üzrə Dövlət Müfəttişliyinə şikayət verib. Lent.az-ın Rusiya KİV-nə istinadən məlumatına görə, şikayətçi prezidenti yol hərəkət qaydalarını pozmaqda suçlayır.

Şikayətə “Vesti” telekanalının Soçidən hazırladığı reportaj əsas verib: süjetdə aydın görünür ki, prezident futbol matçına baxdıqdan sonra kafedən çıxıb maşının sükanı arxasına keçir, lakin.... təhlükəsizlik kəmərini bağlamır!
Şikayətçi Regionlararası İnsan Hüquqlarını müdafiə mərkəzinin mətbuat katibi Vyaçeslav Başkovdur. O, jurnalistlərlə söhbətində deyib: “Mən prezidentin hərəkətindən heyrətə gəldim. O, öz hərəkətləri ilə vətəndaşlara qanuna əməl etməkdə nümunə olmalıdır”. Eyni şikayətlə moskvalı ssenarist Oleq Kozırev də Müfəttişliyə müraciət edib.
Müfəttişliyin təbliğat şöbəsinin rəhbəri Vladimir Şevçenko bildirib ki, “preizdentin yollardakı davranışına nəzartə etmək Müfəttişliyin səlahiyyətlərinə aid deyil”. Federal Mçühafizə xidmətindən isə bildiriblər ki, medvedev maşın yerindən tərpənən anda kəməri bağlayıb.
Rusiya qanunlarına görə, kəmərdən istifadə etməmək 500 rubl cəriməylə cəzalandırılır.
Qeyd edək ki, son vaxtlar Medvedev yol hərəkətinin təhlükəsizliyinin artırılması istiqamətində geniş kampaniya başlayıb. Prezidentin dəyərləndirməsinə görə, yol qəzalarından ölkəyə dəyən iqtisadi zərər 5,5 trilyon rubla çatıb...