Amerikanın casus-peykləri Gürcüstanı nəzarətə götürdü

ABŞ Milli Təhlükəsizlik Şurasının məzuniyyətdə olan əməkdaşları geriyə işə çağırılıblar
Amerikanın casus-peykləri Gürcüstanın bütün ərazisini sutkaboyu nəzarətə götürüb. Lent.az-ın məlumatına görə, bu barədə Gürcüstanın “İmedi” telekanalı xəbər verib.
Məlumata görə, Vaşinqtonda ölkə rəhbərliyinə Cənubi Qafqazdakı vəziyyətlə bağlı detallı məlumat təqdim edən xüsusi qrup yaradılıb. Telekanal xəbər verir ki, bunu üçün ABŞ Milli Təhlükəsizlik Şurasının məzuniyyətdə olan əməkdaşları geriyə işə çağırılıblar.
“İmedi”nin bildiridiyinə görə, bu, ötən il Cənubi Osetiyada başlanmış müharibədən qərbin xəbərsiz olması faktının təkrarlanmaması üçün düşünülüb.
Hazırda regionda vəziyyət yenidən gərginləşir. Tərəflər bir-birini silahlı təxribatda suçlayır, Rusiyanın Cənubi osetiyadakı hərbi qüvvələri isə döyüş hazırlığı vəziyyətinə gətirilib.
Gürcüstan hesab edir ki, ötən il müharibə avqustun 7-də, Rusiya tanklarının respublika ərazisinə daxil olması ilə başlayıb. Rusiyanın mövqeyi isə belədir ki, müharibə avqustun 8-də gürcü qoşunlarının Sxinvaliyə hücumu ilə başlayıb.