Əsəd rejiminə dəstək: min «Hizbullah»çı Suriyada

Bəşar Əsəd rejiminin uzun müddətə davam gətirməsində xarici qüvvələrin dəstəyi ilə bağlı çeşidli xəbərlər yayılmaqdadır.

Lent.az-ın Türkiyənin NTV-sinə istinadən məlumatına görə, Suriyanın bir çox bölgələrini müxalifətin nəzarətinə verən, Əsəd rejiminin imdadına ölkənin cənubunda «Hizbullah» yetişib.

Mənbə bildirib ki, Livan-Suriya sərhədindəki bir sıra kəndlərdə nəzarəti ələ keçirmək uğrunda «Hizbullah»-çılarla Suriya müxalifəti arasında qızğın döyüş gedib.

Həftə sonundan bəri davam edən atışmalarda 14 «Hizbullah»-çının öldürüldüyü iddia edilir.

Suriyanın Humus və əl-Kuseyr rayonlarındakı bəzi kəndlərə nəzarət edən «Hizbullah»-la savaşan müxalifət bildirib ki, Livandakı «Hizbullah» Əsədə yardım etmək üçün Suriyaya min yaraqlı göndərib.

Suriyanın sərhəddəki 8 kəndini ələ keçirən Livandan göndərilən yaraqlılar daha 3 belə yaşayış məntəqəni nəzarətə götürmək istəyəndə müxalifətlə aralarında döyüş olub. Nəticədə 5 müxalifətçi, bir «Hizbullah» yaraqlısı öldürülüb.

Azad Suriya Ordusunun sözçüsü Louay əl-Müqdəd bildirib ki, kəndlilərdən savaş gedən kəndləri tərk etmələrini istəyirlər. Onun sözlərinə əsasən, «Hizbullah» suriyalı dinc əhaliyə qarşı «adı bilinməyən bir savaş elan edib». Əl-Müqdəd livanlı yaraqlıların yerləşdiyi bölgələri Əsəd qırıcılarının bombalamadığını vurğulayıb.

Mənbə qeyd edib ki, «Hizbullah»-çılarla müxalifət arasında savaş İran İnqilab Keşikçiləri Qvardiyasının təmsilçisi Hisam Xoşnəfis («Həsən Şətiri») öldürüləndən sonra daha da sürəklənib.

Qeyd edək ki, o, Dəməşqdən Beyruta gedərkən yolda «silahlı terrorçular tərəfindən» öldürülüb.