TQDK sədri özəl ali məktəbləri təhsil haqqında güzəştlərə çağırdı

“Özəl ali təhsil müəssisələri əsasən humanitar və iqtisadiyyat ixtisasları üzrə mütəxəssis hazırlığı həyata keçirir. Abituriyentlər özəl ali təhsil müəssisələrinin ixtisaslarını ərizələrində axırıncı mövqelərdə göstərdiklərindən bu təhsil müəssisələrinin çoxunda müsabiqə vəziyyəti aşağı olur”. Lent.az-ın məlumatına görə, bunu TQDK sədri Məleykə Abbaszadə bildirib. Onun sözlərinə görə, abituriyentlər ərizələrinin ilk yerlərində əsasən dövlət ali təhsil müəssisələrinin ixtisaslarını kodlaşdırırlar. “2013-cü ildə sənəd verənlər arasında özəl ali təhsil müəssisələrinin ixtisas kodlarını ərizələrində birinci yerdə göstərənlər cəmi 5.02 faiz olub. 2000-ci illərin başlanğıcında bu göstərici 0.67 faiz olub. On ilə yaxın vaxt keçməsinə baxmayaraq, bu sahədə irəliləyiş çox kiçikdir. Bu baxımdan, hazırda da özəl ali təhsil müəssisələrinə qəbul olanlar əsasən dövlət ali təhsil müəssisələrinə qəbul ola bilməyənlərdir ki, onların da böyük əksəriyyətinin biliyi kafi səviyyəsindən yuxarı deyil. 2010-cu ilə qədər yalnız ödənişli əsaslarla təhsil verdiyi üçün özəl ali təhsil müəssisələrinə bu cür abituriyentlərin qəbul olması həmin ali təhsil müəssisələrinin dövlət ali təhsil müəssisələri ilə rəqabət aparmaq imkanlarını məhdudlaşdırırdı. Bu gün özəl ali təhsil müəssisələri dövlət ali təhsil müəssisələri ilə dövlət sifarişi əsasında qəbul aparılan yerləri tutmaq üçün rəqabət aparmaq və ümumiyyətlə, daha bilikli gəncləri özlərinə cəlb etmək üçün həm təhsilin səviyyəsini qaldırmalı, həm də yüksək intellektli tələbələrə təhsil haqqının məbləğində əhəmiyyətli güzəştlər etməlidirlər”. Komissiya sədrinin sözlərinə görə, ali təhsil müəssisələrinə qəbul imtahanlarında iştirak etmiş gənclərin yalnız 35.03 %-i ali təhsil müəssisələrinə qəbul olub. Qəbul olanların 32.21%-i dövlət sifarişi əsasında (31.08% -i dövlət, 1.13 %-i özəl ali təhsil müəssisələrində), 67.79 %-i isə ödənişli təhsil forması üzrə (54.04 %-i dövlət, 13.75 %-i özəl ali təhsil müəssisələrində) ali təhsil almaq hüququ qazanıb. “İmtahanda iştirak edən abituriyentlərin 64.97%-i ali təhsil müəssisələrinə qəbul olmayıb. Bu, say hesabı ilə 62840 nəfərdir. Təqdim edilən rəqəmlər qəbul prosesində həm rəqabətin, həm istəkləri təmin edilməyənlərin sayının nə qədər çox olduğunu, həm də qəbul prosesinin kütləviliyini, ağır və məsuliyyətli iş olduğunu göstərir”. M. Abbaszadə onu da vurğulayıb ki, ötən il TQDK-da apelyasiya komissiyası bir neçə mərhələdə fəaliyyət göstərib. “İlk olaraq hər bir ixtisas qrupu üzrə imtahan keçirilən gündən sonra apelyasiyada imtahanın gedişi və qəbul imtahanlarında ayrı-ayrı fənlər üzrə istifadə edilmiş test tapşırıqlarının məzmunu ilə əlaqədar müraciətlərə baxılıb”.