“2015-ci ildə Bakı şəhərində I Avropa Oyunlarının keçirilməsi ilə əlaqədar olaraq paytaxtda yerləşən təhsil müəssisələrində buraxılış imtahanlarının vaxtı dəyişə bilər”. Bunu Lent.az-a açıqlamasında Tələbə Qəbulu üzrə Dövlət Komissiyasının mətbuat xidmətinin rəhbəri Elnur Nağızadə bildirib. O qeyd edib ki, regionlarda keçirilən buraxılış imtahanlarının vaxtının dəyişdirilməsindən söhbət gedə bilməz.
“Ali məktəblərə qəbul imtahanlarının vaxtının isə dəyişib-dəyişməməsi hələlik məlum deyil”-deyə, TQDK rəsmisi bildirib.
Qeyd edək ki, təhsil naziri Mikayıl Cabbarovun əmri ilə 2015-ci ildə Bakı şəhərində I Avropa Oyunlarının keçirilməsi ilə əlaqədar olaraq paytaxtda yerləşən bütün təhsil müəssisələrində təhsil prosesi və imtahan sessiyasının 2015-ci il mayın 31-dək başa çatdırılması qərar alınıb. Bu məqsədlə 2014/2015-ci tədris ili üçün Bakı şəhərində yerləşən ali və orta ixtisas təhsili müəssisələrində nəzəri təlim müddətinin (15 həftə) vaxtını dəyişmədən, imtahan sessiyalarına ayrılmış 5 həftənin 3 həftəyə qədər, qış tətili müddətinin 2 həftədən 1 həftəyə qədər, peşə-ixtisas təhsili müəssisələrində isə ikinci yarım il üçün nəzərdə tutulmuş təhsil müddətinin 23 həftədən 21 həftəyədək azaldılması nəzərdə tutulur. Bununla bağlı Təhsil Nazirliyindən ali və peşə təhsili müəssisələrinə müvafiq məktublar göndərilib.
Ümumtəhsil məktəblərində təhsil müddəti 31 mayda bitdiyi üçün bu qərar ancaq ali və orta ixtisas, eləcə də ilk- peşə ixtisas müəssisələrinin tələbə və şagirdlərinə aiddir.
Bizi Telegram-da izləyin
t.me/lent_az
Bizi Instagram-da izləyin
Bizi Facebook-da izləyin
Bizi Twitter-da izləyin
