MŞ üzvləri Heydər Əliyevin və Həsən bəy Zərdabinin məzarlarını ziyarət ediblər
22 iyul 2015 11:34 (UTC +04:00)

MŞ üzvləri Heydər Əliyevin və Həsən bəy Zərdabinin məzarlarını ziyarət ediblər

 

Mətbuat Şurasının İdarə Heyətinin üzvləri və media nümayəndələri Azərbaycan milli mətbuatının 140 illiyi münasibətilə Fəxri Xiyabanda Heydər Əliyevin məzarını ziyarət ediblər. APA-nın xəbərinə görə, media nümayəndələri məzarın önünə əklil qoyublar.

 

Daha sonra milli mətbuatın banisi Həsən bəy Zərdabinin məzarı ziyarət olunub. Mətbuat Şurasının sədri Əflatun Amaşov Zərdabinin əsasını qoyduğu “Əkinçi” qəzetinin fəaliyyətindən danışıb: “Həsən bəy Zərdabi Azərbaycan xalqının inkişafına mane olan faktorları – mövhumatı, savadsızlığı bizim üçün bəlli etdi. Bizim xalqımızın inkişaf yolu maarifdən keçir. Bu gün Azərbaycan mətbuatı vətənpərvər mətbuatdır”.

 

Şura sədri “Əkinçi” qəzetində erməni məsələsinə də geniş yer verildiyini söyləyib: “Bu gün bizim qarşımızda duran əsas vəzifə Azərbaycanın beynəlxalq aləmdə imicinin daha da möhkəmlənməsi, Dağlıq Qarabağ, o cümlədən Azərbaycan həqiqətlərinin dünya ictimaiyyətinə çatdırılmasıdır. Həsən bəy Zərdabiyə, habelə Azərbaycan xalqının inkişafında rol oynayan ayrı-ayrı söz sahiblərinə Allah rəhmət eləsin!”

 

Bakı Dövlət Universitetinin jurnalistika fakültəsinin dekanı Şamil Vəliyev “Əkinçi” qəzetinin milli mətbuat tariximizdəki rolu haqda çıxış edib. O, Zərdabinin ideyalarının bu gün də yaşadığını vurğulayıb.  

 

# 260
avatar

Oxşar yazılar