Jurnalistlər düşmənlə sərhəddəki məktəbdə oldular

Bu gün Təhsil və Müdafiə Nazirliklərinin birgə təşkilatçılığı ilə 30 - dək jurnalist Tovuzun Ermənistanla cəbhə xəttində yerləşən Hacallı kəndinə səfər ediblər. Lent.az-ın əməkdaşının verdiyi məlumata görə, jurnalistlər Milli Qəhrəman Qasım Rzayevin adını daşıyan Hacallı kənd orta məktəbində baş çəkib, məktəblə yaxından tanış olublar. Avqust ayında ermənilərin cəbhə xəttində mütəmadi atəşkəsi pozması nəticəsində bu məktəbə də ziyan dəyib. Güllə sinif otaqlarının şüşələrini sındırıb, məktəbin divarlarını, sinif otaqlarından birinin lövhəsini dağıdıb.

Məktəbin direktoru Mehriban Rüstəmova jurnalistlərə verdiyi açıqlamada şagirdlərin , o cümlədən məktəb kollektivinin cəbhədə baş verən gərgin vəziyyətə baxmayaraq dərsləri davam etdirdiyini, atışmanın şagirdlərin əhvalına təsir etmədiyini deyib. O bildirib ki, şagirdlərin əhval ruhiyyəsi yüksəkdir.

Direktor onu da əlavə edib ki, atışma başlayan zamanı uşaqların təhlükəsizliyi qorumaq üçün şagirdlər məktəbdə saxlanılır. Ailələrə məlumat verilir. Uşaqlar güllədən qorumaq üçün məktəbin dəhlizində saxlanılırlar. Atışma bitəndən sonra valideynləri ilə əlaqə saxlanılandan sonra, evlərə buraxılırlar.

Məktəbdə 455 şagird təhsil alır. Son 5 ildə məktəbin məzunlarından 24-ü ali hərbi məktəb və liseylərə qəbul olunub. 2013 - 2014-cü tədris ilində məktəbi bitirən 37 nəfərdən 9-u ali məktəbə, 3-ü kollecə daxil olub. 10 və 11-ci sinif şagirdləri üçün əyani hərbi hazırlıq dərsləri keçirilir.

İki sinifdə şagirdlərlə jurnalistlərin görüşü olub. Görüş zamanı şagirdlər jurnalistlərin suallarını cavablandırıblar.

Hazırda jurnalistlər bölgədəki hərbi hissədə əsgər və şəxsi heyətlə görüşdədirlər.