"Valideynlər məktəb çantaları seçərkən diqqətli olmalıdır" - Səhiyyə Nazirliyi

“Bəzən valideynlər ağır, bəzəkli çantalar alırlar”.

Lent.az xəbər verir ki, bunu Səhiyyə Nazirliyinin mütəxəssis-eksperti, travmatoloq Kamil Eyvazov deyib.

Onun sözlərinə görə, valideynlər məktəb çantaları seçərkən diqqətli olmalıdır:

"Uşaqların məktəbli çantası bədən çəkisinin 10 faizindən çox olmamalıdır. Bu, uşaqlarda assimetrik olaraq yüklənməyə və onurğa probleminin yaranmasına gətirib çıxara bilər. Deformasiyaların ağır formalarında onurğa beynində gərginliyə səbəb olur və bu da yerimədə problemlərə səbəb ola bilir. Uşaqlarda skolioz və kifoz deformasiyaları 70 dərəcənin üzərində olduqda iç orqanlarda ciddi problemlərə səbəb ola bilir. Bu cür hallardan əvvəl müalicə və cərrahi müdaxilə edilərək deformasiyaların yarada biləcəyi problemlərin qarşısı alınır. Uşaqların uzun müddət eyni vəziyyətdə oturması da düzgün deyil. Bu səbəbdən tövsiyə olunur ki, uşaqlar 35-40 dəqiqədən bir hərəkət üçün ayağa qalxmalı, fasilə verməlidir. Eyni zamanda, uşaqların idmanla məşğul olması, asudə vaxtlarını aktiv keçirməsi tövsiyə olunur".