Müəllim olmaq istəyən namizədlərin sayı AÇIQLANDI

"Əvvəlki illərdən fərqli olaraq bu il müəllimlərin işə qəbul müsabiqəsinin test imtahani mərhələsi Bakı şəhərində bir mərkəzdə deyil, ölkənin 17 şəhər və rayonda 32 mərkəzdə keçirilir”.

Lent.az xəbər verir ki, bunu jurnalistlərə açıqlamasında Təhsil Nazirliyinin İnsan Resursları Mərkəzinin müdiri Eşqi Bağırov deyib.

O bildirib ki, ümumilikdə imtahanlarda iştirak etmək üçün 47 minə yaxın namizədin elektron ərizəsi təsdiq edilib və onlar test imtahanlarında iştirak hüququ qazanıblar.

Onun sözlərinə görə, avqustun 14-də Fransız dili və Fizika fənni üzrə namizədlər imtahana cəlb olunub: “İmtahanlarda bütün sanitar-epidemioloji qaydalara riayət olunur. Bugünki imtahanda 2000-ə yaxın namizəd iştirak edəcək. Növbəti günlərdə bu say artacaq. Test imtahanları 18 gün davam edəcək. İmtahanlar başa çatdıqdan sonra vakansiya seçimi mərhələsi olacaq. Bu mərhələdən də uğurla keçən namizədlər ümumtəhsil məktəblərinə müddətli müqavilə əsasında işə qəbul olunacaqlar. Daha sonra müsahibə mərhələləri təşkil olunacaq. Müsahibə mərhələsindən uğurla keçən namizədlər isə daimi əsaslarla işə qəbul olunacaqlar".

Qeyd edək ki, bu gündən müəllimlərin işə qəbulu üzrə müsabiqənin test mərhələsinə start verilib.