Çörəyin “öldürən üzü” kəşf edildi

Qərbdə və Türkiyədə aparılan araşdırmalar 120 dərəcədən yuxarı temperaturda qızardılan, qovurulan, yaxud sobada bişirilən məhsullarda xərçəngə yol açan akrilamid maddəsinin yarandığını üzə çıxarıb. Lent.az-ın “Hürriyet” qəzetinə istinadən verdiyi məlumata görə, Selçuk Universitetinin Qida fakültəsinin müəllimi, professor Mustafa Karakaya aşağı temperaturda bişirilən qidalardan istifadə etməyi məsləhət görüb.

O, bildirib ki, 120 dərəcədən yuxarı temperaturda hazırlanan qidalarda, xüsusən nişasta ilə zəngin un məmulatlarında akrilamid maddəsi yaranır: “Nişasta ilə zəngin qidalarda daha çox akrilamid meydana gəlir. Ona görə də nişasta ilə zəngin çörək, kartof qızartması kimi qidalar hazırlanarkən diqqətli olmaq lazımdır. Türkiyədə və dünyanın bir çox ölkələrində çörək 120 dərəcədən yuxarı temperaturda bişirildiyi üçün çörəklə bağlı təhlükə daha böyükdür”.

Mustafa Karakaya yüksək və aşağı temperaturda bişirilən çörəkləri seçməyin çətin olmadığını söyləyib: “Yüksək temperaturda bişən çörəyin qabığı nazik, aşağı temperaturda bişən çörəklərin qabığı qalın olur. Qalın qabıqlı çörək alın”.