Millət vəkilinin doğum günündə albomu təqdim olundu

Sözləri millət vəkili Qənirə Paşayevaya, musiqisi Azərbaycanın əməkdar incəsənət xadimi Aygün Səmədzadəyə məxsus “Nədən Həyat” albomunun təqdimatı keçirilib. Lent.az-ın məlumatına görə, təqdimata ziyalılar, ictimai xadimlər, KİV nümayəndələri iştirak ediblər.

Q.Paşayeva bütün qadınları 8 Mart - Beynəlxalq Qadınlar günü münasibətilə təbrik edib. O, təqdimatın "Qadınlara qarşı zorakılığa YOX deyək!" çağırışı altında keçirilməsinin və bir xeyriyyə aksiyası olmasının xüsusi önəm daşıdığını deyib: "Biz qadınların məişət zorakılığı da daxil olmaqla, məruz qaldıqları bütün növ zorakılıqlara qarşı mübarizəmizi bir cəmiyyət olaraq daha da artırmalı, hər gün ailəmizdən, ətrafımızdan başlayaraq bu cür mənfi hallara qarşı hər birimiz mübarizə aparmalıyıq”.

Dünyanın hər yerində bu kimi halların olduğunu vurğulayan millət vəkili Azərbaycanın da sivil, inkişaf edən ölkələrdən biri olaraq bu cür mənfi hallara qarşı mübarizə aparan ölkələrdən biri olduğunu söyləyib. Onun sözlərinə görə, bu istiqamətdə ölkəmizdə qanunlar qəbul olunub və işlər getdikcə daha da sürətlənib, cəmiyyətin hər bir üzvünün, hər bir vətəndaşın da bu kimi mənfi hallara qarşı mübarizədə üzərinə böyük rol düşür: “Ailələrimizdə böyüyən uşaqlar bu ruhda, “Qadına qarşı zorakılıq ən böyük insan haqları pozuntusudur” - deyə tərbiyə edilməlidir. Kişilər öz ailələrindən, evlərindən başlamalıdır bu nəcib işə - həyat yoldaşlarına qarşı bu cür hallara yol verməməklə... Biz hamımız öz ətrafımızdan başlamalıyıq. Ailələrdən başlamalıyıq... Bağçalardan, məktəblərdən başlamalıyıq maarifləndirməyə, uşaqları bu istiqamətdə öyrətməyə, tərbiyə etməyə. Biz ətrafımızda baş verən bu cür mənfi hallara qarşı laqeyd və duyarsız olmamalıyıq, hər yerdə bu kimi hallara qarşı öz münasibətimizi bildirməliyik”.

Q.Paşayeva “Nədən Həyat” albomundan əldə olunan gəlirin zorakılığa məruz qalmış qadınlar üçün sığınacaq mərkəzlərinə bağışlanacağını və bununla köməyə ehtiyacı olan bir sıra qadınlara yardımçı olacaqlarından məmnunluq duyduğunu dilə gətirib.

Tədbirə qatılanlardan millət vəkili, akademik Ziyad Səmədzadə, bəstəkar Aygün Səmədzadə, professor, filologiya elmləri doktoru Qəzənfər Paşayev çıxış edərək, Qənirə Paşayevanı həm də doğum günü münasibətilə təbrik ediblər.

Sonra əməkdar artistlər Eyyub Yaqubov, Lalə Məmmədova, gənc sənətçilər Ayaz Qasımov, Nurlan Növrəsli, Vüsal Hacıyev alboma daxil olan mahnıları ifa ediblər.