Dünyada acı çəkən körpələrin görüntüləri ekranlaşdırıldı - VİDEO

Millət vəkili Qənirə Paşayeva və əməkdar artist Tünzalə üzərində birgə işlədikləri yeni layihəni təqdim ediblər. Lent.az-ın məlumatına görə, təqdimatda “Bir Dünya İstəyirəm!” adlanan mahnı və klip nümayiş olunub. Klipə baxışdan sonra çıxış edən Qənirə Paşayeva bildirib ki, layihəni təqdim etməkdə məqsədi cəmiyyətdə baş verən faciələr zamanı uşaqların daha çox əzab çəkdiyini ictimaiyyətə göstərməkdir: “Bu gün dünyada gərginlik getdikcə artır. Savaşlardan, ailədaxili zorakılığın artmasından ən çox əziyyət çəkən körpələr olur. Bu klip 20 Yanvar hadisələrin 23-cü ildönümü ərəfəsində təqdim olunur. Çünki bizim yüzlərlə azyaşlı soydaşımız həmin hadisələrdə ailə başçılarını itirdi. Eləcə də Xocalı, Qaradağ, Bağanıs-Ayrımda baş verən faciələrdə körpələrimiz acı yaşadı. Biz də düşündük ki, körpələrin adından sülh üçün bir çağırış edək. Bütün dünyada insanların xətalarının bədəlini uşaqlar ödəyir. Ona görə də bu layihənin dünyanın bir çox ölkələrində təqdim etmək niyyətindəyik”.

Klipdə Xocalı, 20 Yanvar hadisələri, erməni işğalı nəticəsində qaçqın düşən uşaqlarımızın görüntüləri olmaqla bərabər, həmçinin Pakistan, Afrikanın Somali və Sudan əyalətində ağır həyat sürən uşaqların, Serbiya soyqırımı və ABŞ-ın Konnektikut Ştatında məktəblərin birində baş verən faciə zamanı acı çəkən azyaşlıların görüntüləri yer alıb.

Tünzalə Ağayeva bildirib ki, bu klip şəhidlərin xatirəsinə ithafdır: “Bu mahnı, insan oğlunun öz əli ilə törətdiyi bəlaların fərqinə varsın, düşünsün deyə hayqırışdı, övladlarımızın sevgi, hüzur dolu bir dünyada yaşamaq istəyinin bir ifadəsidir, Rəbbimizə bir duadır”.

Müğənni bildirib ki, klip geniş tamaşaçı auditoriyası üçün təqdim ediləcək. Onun sözlərinə görə, klip hansı ölkədə təqdim edilərsə, mahnının sözləri həmin dildə subtitrlər vasitəsi ilə tərcüməsi əlavə ediləcək.

Klipin rejissoru Ülviyə Könül, modelyer-stilisti Gülnarə Xəlilovadır. Mahnıda “Noğullar” uşaq vokal qrupu iştirak edir, qrupun rəhbəri Məryəm və Natiq Qəzənfəroğlu ailəsidir.

Klip "Avrasiya Beynəlxalq Araşdırmalar İnstitutu" İB-nin dəstəyi ilə çəkilib.

http://www.youtube.com/watch?v=Xdlt9zat-0M