“Bizim teatr” beynəlxalq festivalı keçiriləcək

Martın 27-dən 29-dək Bakı Uşaq Teatrının təşəbbüsü və Azərbaycan Teatr Xadimləri İttifaqının (ATXİ) təşkilati dəstəyi ilə Bakıda “Bizim teatr” beynəlxalq teatr festivalı keçiriləcək.

ATXİ-nin məsul katibi Kəmalə Cəfərzadənin APA-ya verdiyi məlumata görə, festivalda Azərbaycanla yanaşı, Türkiyə, Gürcüstan və İranın teatr kollektivləri iştirak edəcək:

“Festivalın məqsədi aktyorların diqqət mərkəzində olmasına şərait yaratmaq, onlara öz bacarıqlarını nümayiş etdirmək üçün meydan vermək, ölkədə festival ənənəsinin genişlənməsinə vasitəçi olmaqdır”.

K. Cəfərzadə bildirib ki, festivalın bütün tamaşaları ATXİ-nin tamaşa zalında və foyesində təqdim ediləcək.