Pakistanda dahi Azərbaycan şairi barədə məqalə işıq üzü görüb

Xarici İşlər Nazirliyinin mətbuat xidmətindən Lent.az-a verilən məlumata görə, müəllif Amir Mahmud Batti məqalədə Şərqin dahi şairi və filosofu olan Nizami Gəncəvinin gənclik illərindən, yaşadığı həyat tərzindən, eləcə də yaradıcılığındakı lirik poemalar, qəzəllər və qəsidələrdən bəhs edib. Nizaminin ən məşhur əsərlərindən biri olan “Xəmsə”ə daxil olan beş poemanın hər birindən söz açan müəllif bu poemalarda təsvir olunan personajların sonralar Avropa ədəbiyyatında Şiller və Puççini tərəfindən prototip kimi istifadə olunduğunu vurğulayıb. Məqalədə şairin “Yeddi Gözəl” poemasının dünya ədəbiyyatı irsinə qızıl hərflərlə əks olunduğunu bildirilib və bu əsərin Şərqdə ilk dəfə Azərbaycanın görkəmli bəstəkarı Üzeyir Hacıbəyov tərəfindən opera səhnəsinə qoyulmasına dair məlumat verilib.

Amir Batti qeyd edib ki, Nizami öz yaradıcılığında qadına böyük dəyər verib, əməyə hörmətlə yanaşıb və böyük vətənpərvər kimi xalqının qəhrəmanlıq salnaməsi ilə fəxr edib. Müəllif Nizaminin əlyazmalarının Paris, London, Moskva, Qahirə, İstanbul və digər şəhərlərin muzeylərində hazırda saxlanıldığını və şairin əsərlərinin bir sıra dünya dillərinə tərcümə edildiyini nəzərə çatdırıb. Məqalədə Azərbaycan xalqının Nizami yaradıcılığına böyük məhəbbətlə yanaşdığı və onun əsərlərinin Azərbaycan folkloruna böyük təsir etdiyi xüsusi vurğulanıb.