Xan Şuşinskinin 110 illik yubileyidir

Bu il Azərbaycan muğam sənətinin korifeyi, xalq artisti Xan Şuşinskinin yubiley ilidir. Avqustun 20-də böyük sənətkarın 110 yaşı tamam olur. Bununla əlaqədar olaraq sənətkarın ailə üzvləri tərəfindən Xan Şuşinski Fondu yaradılacaq.

Fond barədə Lent.az-a açıqlama verən Xan Şuşinskinin qızı Bəyimxanım Verdiyeva bildirib ki, təşkilatın yaradılması üçün lazım olan bütün sənədlər artıq Ədliyyə Nazirliyinə təqdim olunub: “Əslində xeyli müddətdir fondun yaradılması üzərində iş gedir. Lazımi sənədləri də çoxdan təqdim etmişdik. Ancaq müəyyən problemlər oldu və biz sənədləri yenidən Ədliyyə Nazirliyinə təqdim etdik. Təxminən bir aya bizə konkret cavab veriləcək və heç bir problem olmazsa, fond fəaliyyətə başlayacaq”.

B. Verdiyeva Xan Şuşinskinin yubileyi ilə əlaqədar Mədəniyyət və Turizm Nazirliyi tərəfindən tədbir keçiriləcəyini də bildirib: “Bizdə olan məlumata görə, oktyabr ayında yubiley tədbirinin keçirilməsi planlaşdırılır. Yəqin ki, bununla əlaqədar olaraq Əbülfəs Qarayev bizi qəbul edəcək. Ümid edirəm ki, atamın 110 illik yubileyi də onun adına layiq şəkildə yüksək səviyyədə qeyd olunar. Çünki 2001-ci ildə mərhum Heydər Əliyevin sərəncamı ilə 100 illik yubiley dövlət səviyyəsində keçirildi”.

Xəyalə Muradlı