“Azərbaycandan Ermənistana nümayəndə heyəti getməyib”

Xəbər verildiyi kimi, İrəvanda MDB-nin “Mədəni siyasət - mədəniyyət üçün siyasət: mədəniyyət sahəsində siyasətin yeni profili” mövzusunda regional konfransı başlayır.

Tədbirin təşkilatçıları arasında Azərbaycan da var. Noyabrın 7-dək davam edəcək konfrans Ermənistan Respublikası Mədəniyyət Nazirliyi tərəfindən YUNESKO-nun Azərbaycan, Ermənistan, Belarus, Moldova və Rusiya üzrə Moskva Bürosunun, MDB Dövlətlərarası Humanitar Əməkdaşlıq Fondunun dəstəyi ilə Ermənistanın “İnterlinqva” Linqvistika Universiteti və Rusiya Kulturologiya İnstitutu ilə birgə təşkil edilib.

Mətbuatda yayılan məlumata görə, Azərbaycan Mədəniyyət və Turizm Nazirliyinin Ermənistana yollanan nümayəndə heyətinin bu gün Ermənistan prezidenti Serj Sarkisyanla görüşü gözlənilir.

Mədəniyyət və Turizm Nazirliyinin mətbuat xidmətini rəhbəri İntiqam Hümbətov Lent.az-a açıqlamasında xəbəri təkzib edib: “Belə bir görüşün reallaşması mümkün deyil. Mədəniyyət və Turizm Nazirliyi tərəfindən Ermənistana nümayəndə heyəti yollanmayıb”.

Lalə Yusifqızı