Naxçıvan Teatrı yeni mövsümü “Qurbanəli bəy”lə açdı

Cəlil Məmmədquluzadə adına Naxçıvan Dövlət Musiqili Dram Teatrı 127-ci mövsümünə başladı. Naxçıvan MR Mədəniyyət və Turizm Nazirliyinin mətbuat xidmətinin rəhbəri Əli Rzayevin Lent.az-a verdiyi məlumata görə, teatr yeni mövsümünü Mirzə Cəlilin “Qurbanəli bəy” hekayəsi əsasında hazırlanan səhnə əsəri ilə başlayıb. Xalq artisti Kamran Quliyevin səhnələşdirdiyi tamaşanın quruluşçu rejissoru Faiq Musayev, quruluşçu rəssamı Naxçıvan Muxtar Respublikasının əməkdar rəssamı Əbülfəz Axundovdur.

Səhnə əsərində əsas rolları Azərbaycan Respublikasının xalq artistləri Rza Xudiyev, Rövşən Hüseynov, Həsən Ağasoy, əməkdar artistlər Xəlil Hüseynov, Yusif Allahverdiyev və başqaları ifa ediblər.

Qeyd edək ki, C. Məmmədquluzadə adına Naxçıvan Dövlət Musiqili Dram Teatrı bu il Anarın “Qaravəlli”, xalq yazıçısı Elçin Əfəndiyevin “Ah Paris…Paris…” əsərlərini tamaşaya qoyub. Teatr ilin sonunadək Əkrəm Əylislinin “Yazığam, sevmə məni” və Şamil Sadiqin “Qana qan qarışdı” əsərlərini də səhnələşdirəcək.

Fariz YUNİSLİ