Kürdəmirdə yandırılmış şəhərin qalıqları tapıldı

Divarlarının hündürlüyü 2 metr olan unikal tikinti kompleksi, 300-ə yaxın müxtəlif saxsı qablar, muncuq, mis pullar və s. aşkar edilib
Azərbaycan Milli Elmlər Akademiyası (AMEA) Arxeologiya və Etnoqrafiya İnstitutunun Ağsu-İsmayıllı arxeoloji ekspedisiyasının əməkdaşlarının Kürdəmir rayonunun Ərəbqubalı kəndi ərazisində apardıqları arxeoloji tədqiqatlar zamanı XII-XIII əsrlərdə mövcud olmuş şəhər qalıqları aşkar edilib. Bu barədə Lent.az-a AMEA-nın mətbuat xidmətindən məlumat verilib.
Qazıntıya rəhbərlik edən AMEA Arxeologiya və Etnoqrafiya İnstitutunun Ağsu-İsmayıllı arxeoloji ekspedisiyasının rəhbəri, tarix elmləri doktoru Qafar Cəbiyev şəhərin yandırıldığının ehtimal edildiyini söyləyib. Təxminən 200 kvadrat metr sahədə aparılan qazıntı işləri nəticəsində əsas divarlarının hündürlüyü 2 metrdən ibarət olan unikal tikinti kompleksinin, 300-ə yaxın müxtəlif saxsı qablar, muncuq, mis pullar və s. aşkar edildiyini bildirən Q.Cəbiyev tapılan əşyaların laborator araşdırmalardan sonra Kürdəmir muzeyinə təhvil veriləcəyini bildirib.
Arxeoloji qazıntılar davam edir.
Pərvin ABBASOV