İlhamə Quliyeva Sabir Rüstəmxanlıya cavab verdi

“O DAK-a gələndən sonra təşkilat 3-4 hissəyə parçalandı”
Azərbaycanın Xalq artisti İlhamə Quliyeva Dünya Azərbaycanlıları Konqresinin (DAK) həmsədri, millət vəkili Sabir Rüstəmxanlının Dünya Azərbaycanlıları Birliyi (DAB) və onun özü haqqında söylədiklərinə münasibət bildirib. Xalq artisti Lent.az-a bildirib ki, DAB yaxın günlərdə öz fəaliyyəti ilə bütün söz-söhbətlərə son qoyacaq və kimin Azərbaycan dövləti və xalqı üçün daha səmərəli işlər gördüyünü sübuta yetirəcək: “Mənim şair kimi Sabir Rüstəmxanlının fikirlərinə hörmətim var. Lakin onun nəzərinə çatdırım ki, artıq Dünya Azərbaycanlıları Birliyi yaranıb və yaxın günlərdə öz xeyirli işləri ilə fəaliyyətə başlayacaq. Bundan sonra həm Dünya Azərbaycanlıları Birliyinin, həm də Dünya Azərbaycanlıları Konqresinin fəaliyyəti göz qabağında olacaq. Zaman özü kimin necə olduğunu göstərəcək. Sabir Rüstəmxanlı DAK-a gələndən sonra təşkilat 3-4 hissəyə parçalandı. Artıq DAK yox olmaq həddinə çatıb. Əgər Sabir Rüstəmxanlının DAB-ın yaranmasına şübhəsi varsa, buyursun Belçika vətəndaşı olan həmyerlimiz Ədalət Quliyevlə əlaqə saxlasın. Təşkilatın nizamnaməsi və qeydiyyat vərəqəsi ondadır. Ədalət müəllim də hazırda Bakıdadır, Sabir Rüstəmxanlı istədiyi vaxt ona müraciət edə bilər”.
Pərvin ABBASOV