Vokalçıların Bülbül adına V Beynəlxalq müsabiqəsi başlayır

Noyabrın 16-dan 21-ə kimi Bakıda Vokalçıların Bülbül adına V Beynəlxalq Müsabiqəsi keçiriləcək. Mədəniyyət və Turizm Nazirliyi və “Bülbül” fondunun təşkilatçılığı ilə keçirilən müsabiqədə 11 ölkədən 79 nəfər ifaçının iştirakı gözlənilir.

Nazirliyin mətbuat katibi İntiqam Hümbətovun Lent.az-a verdiyi məlumata görə, müsabiqənin rəsmi açılış mərasimi noyabrın 16-da Azərbaycan Dövlət Filarmoniyasında olacaq. İ. Hümbətovun sözlərinə görə, müsabiqənin beynəlxalq tərkibli münsiflər heyətinə uzun illərdən bəri təkrarolunmaz müğənni və pedaqoq, unudulmaz sənətkar İrina Arxipova rəhbərlik edib. Bu il bu missiya opera səhnəsinin görkəmli nümayəndəsi, SSRİ xalq artisti Yevgeni Nesterenkoya həvalə olunub. Müsabiqənin uzunillik tarixində ilk dəfə olaraq münsiflər heyətinin tərkibinə nəinki ifaçılar, həm də tanınmış menecerlər, prodüserlər, dünyada ən məşhur opera teatrlarının rəhbərləri daxildir. Elə ona görə də böyük nüfuz qazanan müsabiqədə iştirak etmək arzusunda olan gənc vokalçıların sayı ildən-ilə artır.

Xəyalə