“Sərginin digər məkanlarda keçirilməsi binanın qəza vəziyyətində olması ilə əlaqədardır”

Bunu Lent.az-ın sualını cavablandırarkən muzeyin baş elmi işçisi, Cəfər Cabbarlının nəvəsi Qəmər Seyfəddinqızı deyib. Onun sözlərinə görə, Mədəniyyət və Turizm Nazirliyinin əmri ilə muzeydə ekspozisiyanın nümayişi dayandırılıb: “Muzey qəza vəziyyətində olduğuna görə, məktəblilərin, ziyarətçilərin gəlməyi təhlükəli ola bilər. Ona görə də muzeyin səyyar sərgilərini müxtəlif məkanlarda təşkil edirik. Amma təbii ki, muzey öz fəaliyyətini dayandırmayıb”.

Q. Seyfəddinqızı bildirib ki, ötən əsrin 30-cu illərində tikilən, 1982-ci ildən isə muzey kimi fəaliyyət göstərməyə başlayan bu binanın əsaslı təmirə ehtiyacı var: “Təbii ki, bu müddət ərzində muzeydə bir neçə dəfə təmir işləri aparılıb. Amma son illər təmir olunmayıb, bu da öz təsirini göstərməmiş deyil. Bina özü köhnə binadır. Ona görə də əsaslı təmirə ehtiyac duyur. Ümid edirik ki, tez bir zamanda təmir başlayar. Çünki Mədəniyyət və Turizm Nazirliyinin nümayəndələri muzeylə maraqlanıblar və təmirin həyata keçiriləcəyini deyiblər. O da ola bilsin ki, təmir zamanı bizi burdan köçürsünlər”.

Xəyalə Muradlı