Görkəmli rejissor Hüseyn Seyidzadənin xatirə gecəsi keçirildi

Bu gün Dövlət Film Fondunda Azərbaycanın görkəmli rejissoru Hüseyn Seyidzadənin 100 illik yubileyi münasibətilə xatirə gecəsi keçirilib. Fondun foyesində rejissorun həyat və yaradıcılığını əks etdirən, eyni zamanda film-çəkilişlərdən olan fotolar və kinolarının afişalarından ibarət sərgi nümayiş olunub.

Lent.az-ın tədbirdə iştirak edən əməkdaşının verdiyi məlumata görə, xatirə gecəsi Hüseyn Seyidzadənin həyat və yaradıcılığını əks etdirən slaydın nümayişi ilə başlayıb. Daha sonra fondun direktoru əməkdar incəsənət xadimi Cəmil Quliyev yubilyarın həyat və fəaliyyətindən danışıb. O bildirib ki, Hüseyn Seyidzadə Moskvada görkəmli kino ustaları Mixail Romm və Sergey Eyzenşteyndən dərs alıb, kinonun sirlərini onlardan əxz edib: “Hüseyn Seyidzadə aktyorların daxili aləmini üzə çıxaran rejissorlardan biri olub. Onun filmləri bu gün də yaşayır, sevilir və izlənilir”.

Daha sonra kinoşünas Aydın Kazımzadə görkəmli rejissorun həyat və yaradıcılığı barədə geniş məlumat verib. O Əlisəttar Atakişiyev, Əliağa Ağayevin də vaxtilə ona danışdığı xatirələri, film çəkiləri barədə maraqlı məqamları tədbir iştirakçıları ilə bölüşüb.

Xatirə gecəsində İlham Namiq Kamal, Ziya Şıxlinski də Hüseyn Seyidzadə barədə xatirələrdən danışıblar

Tədbirdə görkəmli rejissorun lentə aldığı “O olmasın, bu olsun”, “Dəli Kür”, “Qayınana” və “Koroğlu” filmlərindən fraqmentlər nümayiş olunub.

Xəyala Muradlı