“Azdrama”nın aktyorları üçün xüsusi trenajor zalı açılıb – EKSKLÜZİV

Bir neçə gündür Teatr Xadimləri İttifaqında Azərbaycan Dövlət Akademik Milli Dram Teatrının aktyorlarına vokal dərsləri keçirilir. Moskva təhsili görmüş müəllimlər plastika üzrə dərs keçir. Bunu Lent.az-a açıqlamasında teatrın direktoru İsrafil İsrafilov deyib. Onu da bildirib ki, aktyor və aktrisaların idmanla məşğul olması üçün xüsusi trenajor zalı da açılıb: “Mədəniyyət və Turizm Nazirliyi bizə bütün avadanlıqları olan gözəl bir idman zalı bağışlayıb. Bu, ona görədir ki, aktyor da idmançı kimi daim formada olmalıdır. Aktyor, aktrisalar da balerinalar kimi zərif, füsunkar görünməlidir. İncəsənətə bəzən estetika, gözəllik sənəti deyirlər. O gözəlliyi tamaşaçı harda görməlidir? Əgər aktyor və ya aktrisa gözəlliyi bəxş edə bilmirsə, gözəlliyi səhnədən zala sirayət etmirsə, bu problemi özündə axtarmalıdır. Mən bunu onların özü üçün deyirəm. Çünki aktyor şişmanlaşanda bir sıra rolları artıq oynaya bilmir, yaradıcılığı məhdudlaşır”.

Xəyalə Muradlı