Bakıda Beynəlxalq Musiqi Festivalı keçiriləcək

Sentyabrın 18-də Üzeyir Musiqi Günündə bəstəkarın 125 illiyinə həsr edilən beynəlxalq musiqi festivalına start veriləcək. Bu barədə Lent.az-a Bəstəkarlar İttifaqının mətbuat xidmətinin rəhbəri İltifat Hacıxanoğlu məlumat verib.

10 gün davam edəcək festival çərçivəsində keçirilən bütün tədbirlərdə Azərbaycan Bəstəkarlar İttifaqının üzvləri bilavasitə yaxından iştirak edəcəklər. Festivalda iştirak etmək üçün ölkəmizə gələcək İsveçrənin “Amaltea” ansamblı və Sinqarurun “Tang” simli kvartetinin konsertlərində Azərbaycan Bəstəkarlar İttifaqının sədri, xalq artisti, professor Firəngiz Əlizadənin əsərləri də ifa olunacaq.

Bununla yanaşı, sentyabrın 16-da Üzeyir Hacıbəyli adına Bakı Musiqi Akademiyasında Bəstəkarlar İttifaqının Qarabağ bölməsinin konserti keçiriləcək. Konsertdə Üzeyir bəyin əsərləri yeni aranjemanda təqdim olunacaq. Bundan başqa, gənc bəstəkarların Üzeyir Hacıbəyliyə həsr olunmuş yeni əsərləri də səslənəcək.

Oktyabr ayında Bakı Musiqi Akademiyası, Bəstəkarlar İttifaqı, Mədəniyyət və Turizm Nazirliyinin təşkilatçılığı ilə Bakıda beynəlxalq elmi konfrans baş tutacaq. Konfransda Üzeyir Hacıbəylinin yaradıcılığına yeni bir baxış olacaq. Noyabr ayında isə “Muğam, məqam və modal musiqinin digər janrları” mövzusunda elmi simpozium keçiriləcək.

Lalə Yusifqızı