Qəbələ II Musiqi Festivalının iştirakçıları bir araya gəldilər

Lent.az-ın məlumatına görə, festivalda Üzeyir Hacıbəyli adına Bakı Musiqi Akademiyasının rektoru, professor, Azərbaycanın və SSRİ-nin xalq artisti Fərhad Bədəlbəyli, əməkdar incəsənət xadimləri Azad Əliyev, Fəxrəddin Kərimov, əməkdar artistlər, Beynəlxalq müsabiqələr laureatları Yeganə Axundova, Murad Hüseynov, pianoçu Səidə Tağızadə, violonçelist Aleksey Miltıx, Opera və Balet Teatrının solistləri Gülnaz İsmayılova, Səbinə Əsədova, Fəridə Məmmədova və başqaları iştirak edib.

Festivalın gedişatı barədə ətraflı məlumat verən Fərhad Bədəlbəyli bildirib ki, ötən ilkinə nisbətən bu il tamaşaçılar daha hazırlıqlı olub: “Birinci festivalda camaat heç hazırlıqlı deyildi. Yerli orqanlar konsertlərə gəlmək üçün əhalini məcbur edirdi. Amma bu il mən çox xahiş etdim ki, belə məcburiyyət olmasın. Sevindiricidir ki, məcburiyyət olmadığı halda, konsertlərə gələn tamaşaçıların sayı çox idi və onlar sona qədər oturub ifaları dinləyirdilər”.

F. Bədəlbəylinin sözlərinə görə, konsertlərin birində Yeganə Axundovanın “İspaniyanın gecələri” ifası zamanı işıq sönüb. Amma sənətçi özünü itirməyib. Vaqif Mustafazadənin əsərlərini eyni oktavada improvizə etməyə başlayıb. Bir neçə dəqiqə sonra işıqlar yananda isə ifasını davam etdirib.

Görüşdə festivaldan kadrlar nümayiş olunub. Eyni zamanda Fərhad Bədəlbəylinin “Şuşanın fəryadı” əsəri də səslənib.

Xəyalə