Bakıda məscid davası edənlərə: Təbrizdə və Urmiyada qədim məscidlər dağılır

Güney Azərbaycanın tarixi abidələri baxımsızlıq ucbatından dağılmaqdadır. Lent.az-ın GünAzTv-yə istinadən məlumatına görə, Azərbaycan mədəniyyəti, tarixi, abidələri və mənəvi həyatını əks etdirən sənət əsərləri nəinki dövlətin dəstəyindən məhrumdur, üstəlik hakimiyyət tərəfindən ağır zərbələrə məruz qalmaqdadır.

Güneydən redaksiyaya daxil olan müraciətdə bildirilib ki, Güney Azərbaycanın Urmiya şəhərinin “Gülüstü” məhəlləsində yerləşən “Lütfəlixan məscidi” uçmaqdadır. Bu məscid Azərbaycanın qədim tarixi abidələrindən sayılır. Təbrizdəki Seyid Həmzə məscidi (Göy məscid) də eyni təhlükə qarşısındadır.

Yeri gəlmişkən, Bakıda məscid davası aparanlardan bu və başqa Azərbaycan əyalətlərində sökülmüş və uçub-dağılmaqda olan qədim məscidin məhv olması ilə bağlı səs çıxmır.

Məlumata görə, 4-5 il öncə şəhərin hazırda “İmam xiyabanı” adlanan küçəsində “Şeyx Əlixan Hamamı”ını da “Sərdaran” prospektinin salınması adı altında sökdülər. Bu özbaşınalıqlara isə hakimiyyətin səlahiyyətli qurumları göz yumdu.

İslam Respublikasına rəhbərlik edənlər Azərbaycanın tarixi abidələrini söküb-dağıda bilməyəndə isə onun adını dəyişir. Urmiya şəhərindəki “Doqquz pillə buzxanası”nın adı dəyişdirilib. İranın Mədəni irsi qoruma idarəsi bu sayaq məsələlərdə tarixiliyi qorumaq yerinə özü bu işlərə başçılıq edir. Qurumun təşəbbüsü ilə “Doqquz pillə buzxanası”nın adı fars dilinə tərcümə edilərək, “Yəxçəle nohe-pille” kimi adlanıb.

Sədrəddin Soltan