Mənsum İbrahimov: “Onlar taleyin ümidinə buraxılmırlar”

“Muğam müsabiqəsinin qalibləri taleyin ümidinə buraxılmırlar. Onlar müəllimlərinin, münsiflər heyəti üzvlərinin və birbaşa Heydər Əliyev Fondunun nəzarətindədirlər”. Bunu Lent.az-a Akademik Opera və Balet Teatrının solisti, xalq artisti Mənsum İbrahimov muğam müsabiqələrinin qaliblərinin gələcək fəaliyyəti ilə bağlı məsələyə münasibət bildirərkən söyləyib.

Xanəndə qeyd edib ki, Azərbaycanın birinci xanımı Mehriban Əliyevanın rəhbərliyi ilə Heydər Əliyev Fondunun layihələri əsasında həyata keçirilən muğam müsabiqələrinin qalibləri daim nəzarət altındadırlar. Onlar arasında bölgələrdə yaşayanlar varsa, Bakıya köçürülür, Milli Konservatoriyanın nəzdindəki musiqi kollecində təhsil almaları təmin olunur: “Məsələn, Elməddin İbrahimov Samuxda təhsil alırdı. Amma hazırda Heydər Əliyev adına Müasir Təhsil Kompleksində oxuyur. Musiqi bölümündə isə mənim nəzarətim altındadır. Ümumiyyətlə, onların hamısı birbaşa Mehriban xanımın nəzarəti altındadırlar. Biz də öz növbəmizdə çalışırıq ki, o uşaqlar yenidən itib-batmasınlar. Müvafiq sahədə təhsil alsınlar. Yəni, onlar taleyin ümidinə buraxılmırlar. Mütəmadi olaraq dövlət tədbirlərində, qastrol səfərlərində, mədəniyyət günlərində iştirak edirlər”.

Mənsum İbrahimovun sözlərinə görə, bunlarla yanaşı müsabiqə qaliblərindən bir neçəsi – Təyyar Bayramov, İlkin Əhmədov, Arzu Əliyeva, Elşad Aydınoğlu, Elnur Zeynalov artıq Akademik Opera və Balet Teatrında, bəzilərisə Muğam Teatrında çalışırlar. Eyni zamanda toylarda, tədbirlərdə iştirak edirlər: “Hansının həyatı ilə maraqlansalar, görərlər ki, şükür Allaha, vəziyyətləri yaxşıdır”.

Xəyalə