Novruz Hollandiyada da qeyd olunub

Martın 13-də Hollandiyada Novruz bayramı şənliyi təşkil olunub. Tədbirin təşkilatçısı, “Vahid, Bölünməz və Demokratik Azərbaycan Uğrunda Birlik” cəmiyyətinin sədri İradə Uluxanlının Lent.az-a verdiyi məlumata görə, tədbirdə Azərbaycanın tarixi, mədəniyyəti, maddi və mənəvi sərvətləri təbliğ olunub. Bunları nümayiş etdirən müxtəlif stendlər hazırlanıb. Tədbirə Azərbaycanın Niderland Krallığındakı səfirinin birinci müavini Elxan Ələsgərov və digər rəsmi qonaqlar da qatılıb. Bayram şənliyi zəngin musiqi proqramı ilə davam edib. Açılışda holland məktəbliləri Azərbaycan dilində şeir söyləyib, yallı rəqsi ifa ediblər. Fransadan gələn fleytaçı "Sarı gəlin" xalq mahnısını səsləndirib. Almaniyadan olan pianoçu isə Arif Məlikovun, Tofiq Quliyevin əsərlərini ifa edib. Bu bəstəkarların əsərləri Holland dosenti və 2 tələbəsi tərəfindən də fleytada çalınıb.

Türkiyənin Tokat Universitetinin dosenti, həmyerlimiz, skripka ustası Lalə Hüseynova ifasında bir sıra Azərbaycan bəstəkarlarının əsərlərini tamaşaçılara təqdim edib. Tədbirə gətirilən aş isə Holland məktəblisinin "Sari gəlin" sədaları altında qonaqlara təqdim olunub. Bayram tədbiri haqda yerli mətbuat orqanı olan "Limburgs Dagblad" və "De limburger" qəzetlərində dərc olunub.