Kinorejissorlar Gildiyası ilə İTV barışdı

Artıq göstəriləcək hər filmə görə təzminat ödənəcək

Azərbaycan Kinorejissorlar Gildiyası ilə İctimai Televiziya (İTV) arasında uzun müddətdir, davam edən məhkəmə çəkişməsi nəhayət başa çatıb.

Kinorejissorlar Gildiyasının vəkili Əkbər Bağırovun Lent.az-a verdiyi məlumata görə, Apellyasiya Məhkəməsində hakim Səadət Bəktaşinin sədrlik etdiyi məhkəmə prosesi tərəflər arasında barışıq müqaviləsinin imzalanması ilə nəticələnib.

“Məlum olduğu kimi, İTV Azərbaycan filmlərini heç bir müqavilə bazası olmadan nümayiş etdirirdi və bunun müqabilində lazım olan məbləği ödəmirdi. Ancaq bundan sonra hər kəs öz üzərinə düşən vəzifəni həyata keçirəcək”, deyən vəkilin sözlərinə görə, məhkəmə prosesi zamanı konstruktiv əməkdaşlıq mövqeyi nümayiş etdirildiyi üçün təşkilat kanal qarşısında irəli sürdüyü bəzi tələbləri geri götürüb və əvvəlki borclardan imtina edib.

Müqavilə şərtlərinə əsasən, yalnız 2009-cu ildə nümayiş etdirilən filmlərə görə yığılan borclar ödənəcək. O ki qaldı 2010-cu ilə, Kinorejissorlar Gildiyası ilə İTV arasındakı yeni razılaşma digər telekanallarla imzalanan müqavilələrə uyğun olaraq, həyata keçiriləcək və təzminat ödənəcək.

Xəyalə Muradlı