Müğənni Cavanşir Məmmədov nazirliyi məhkəməyə verib - EKSKLÜZİV
20 aprel 2009 15:00 (UTC +04:00)

Müğənni Cavanşir Məmmədov nazirliyi məhkəməyə verib - EKSKLÜZİV

Sənətçi ondan 4 min manata yaxın artıq vəsait alındığını iddia edir

Bu gün 1 saylı Bakı Yerli İqtisad Məhkəməsində məşhur müğənni, Azərbaycanın Əməkdar artisti Cavanşir Məmmədovun Vergilər Nazirliyi və Bakı şəhər Vergilər Departamentinin 1 saylı filialına qarşı qaldırdığı iddia üzrə məhkəmə prosesi keçirilib. Lent.az-ın xəbərinə görə, C.Məmmədov məhkəmədən artıq hesablanmış əlavə dəyər vergisinin qaytarılmasını xahiş edib. Belə ki, toylarda ifaçılıq müqabilində aldığı qonorardan vergi verən müğənni ondan təxminən 4 min manata yaxın vəsaitin artıq alındığını iddia edir. O, həmin vəsaitin növbəti aylarda ödəniləcək vergiyə hesablanmasını istəyir.

Bu gün keçirilən məhkəmə prosesində məsələ ilə bağlı bir neçə şadlıq sarayına sorğu göndərilməsi qərara alınıb.

Maraqlı olduğunu nəzərə alaraq qeyd edirik ki, C.Məmmədovu məhkəmədə vəkil, yaxud başqa bir hüquqi nümayəndə təmsil etmir. Məhkəmə prosesinə müğənni şəxsən özü qatılıb.

Məhkəmə prosesi davam etdiriləcək.

Məsələ ilə bağlı Cavanşir Məmmədov Lent.az-ın əməkdaşı ilə söhbətində məhkəmə faktını təsdiqləsə də, bu mövzuda danışmaq istəmədiyini deyib.

Pərvin ABBASOV
# 1174

Oxşar yazılar