Bu gün Bakı Ağır Cinayətlər Məhkəməsində hakim Hüseyn Hüseynlinin sədrliyi ilə Xəyal Hüseynovun cinayət işi üzrə məhkəmə prosesi keçirilib.
Lent.az xəbər verir ki, məhkəmə zərərçəkənin ifadəsi ilə davam edib. Zərərçəkən Elnur Məmmədov təqsirləndirilən şəxslə əvvəllər dostluq münasibətlərinin olduğunu deyib:
"Xəyal 20 manat pul almışdı məndən, neçə müddət idi ki, qaytarmırdı. Zəng elədim buna, dedim "Pulu qaytarmaq fikrin yoxdur?" Başladı bəhanələr gətirib məni acılamağa.Söydük bir - birimizi telefonda. İçkili idim özü də, durub gəldim onun işlədiyi bazara. Yaxınlaşanda gördüm əlindəki bir manatlıq, göy dəstəkli bıçaqla meyvə soyub yeyir. Məni görən kimi üstümə hücum çəkdi, amma gücü çatmadı mənə. Yıxdım onu yerə. Toplaşanlar araladılar bizi. Maşına oturub getdim, gedə-gedə güzgüdə gördüm ki, sifətim qanayıb, üzümdə qanlı cızıq var. Təzədən ora geri qayıtdım, dedim "Mənə "şram" çəkmək istəyirdin, üzümə niyə vurdun?" Tüpürdü üzümə, təzədən bir- birimizə hücum elədik. Mən ona heç vaxt pis olmamışam; ürəyi xaş istəyib, gətirib yedirtmişəm. Allah şeytana lənət eləsin, beş on-dəqiqəlik bir əsəbin oyununa düşdük".
Daha sonra zərərçəkənin müxtəlif vaxtlarda verdiyi ifadələri məhkəmədə səsləndirilib. Bu zaman ifadələrdə olan ziddiyyət və uyğunsuzluq məlum olub. Zərərçəkən buna səbəb kimi həmin vaxt içkinin təsirində olduğunu dedi. Məhkəmə şahid ifadələrinin dinlənilməsi üçün növbəti məhkəməni 5 dekabr saat 10:30 -a təyin etdi.
Xatırladaq ki, 31 yanvar 2025-ci il tarixində Hüseynov Xəyal Ramiz oğlu tanışı Elnur Məmmədovu münaqişə zəminində bıçaqlayaraq xəsarət yetirib. Nərimanov rayon Polis İdarəsinin əməkdaşları tərəfindən saxlanılan X. Hüseynova qarşı Cinayət Məcəlləsinin 29, 120.2.2 və 221.3- cü maddələri ilə ittiham irəli sürülmüşdür.
Fərqanə Novruzova
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
