Kənd təsərrüfatında məhsuldarlıq 3,4 faiz azalıb

Oktyabrın 1-dək Azərbaycanda dənli bitkilər səpilmiş sahələrin 99,4 faizinin məhsulu toplanıb. Həmin sahələrdən qarğıdalı da daxil olmaqla ümumilikdə 1983,8 min ton məhsul götürülüb.

Kənd Təsərrüfatı Nazirliyindən Lent.az-a bildiriblər ki, bu il dənli bitkilərin əkildiyi sahələrdə məhsuldarlıq orta hesabla hər hektarın 20,6 sentner olub. Bu isə ötən illə müqayisədə xeyli aşağıdır.

Tərəvəz istehsalına gəlincə, hazırda ölkənin bir çox bölgələrində kənd təsərrüfatı məhsullarının yığımı davam edir. Hesablamalara görə oktyabrın 1-dək tarlalardan 928,1 min ton kartof, 1104,7 min ton tərəvəz, 416,0 min ton meyvə və giləmeyvə, 428,3 min ton bostan məhsulları, 79,8 min ton üzüm, 12,1 min ton pambıq, 468,5 ton yaşıl çay yarpağı, 2537,4 ton tütün toplanıb.

Nazirlikdə bildirirlər ki, bu il heyvandarlıq təsərrüfatının inkişafı və məhsul istehsalı üçün uğurlu olub. Belə ki, ötən 9 ay ərzində iri buynuzlu mal-qaranın sayı 2616,4 min, qoyun və keçilərin sayı isə 8458,5 min başa çatıb. Bu dövrdə 241,8 min ton diri çəkidə ət, 1157,5 min ton süd, 903,1 milyon ədəd yumurta, 14,8 min ton yun istehsal olunub.

Ümumilikdə 2010-cu ilin ötən dövrü ərzində ölkədə bitkiçilik məhsullarının istehsalı ötən ilki səviyyədən 9,2 faiz aşağı, heyvandarlıq məhsullarının istehsalı isə 6,2 faiz yüksək olub. Bütövlükdə hesabat dövründə kənd təsərrüfatının ümumi məhsulu 3,4 faiz azalıb. Buna səbəb kimi yaz aylarında ölkədə baş verən subasma və torpaq sürüşmələri göstərilir.

Elxan SALAHOV