Əhalinin əmanətlərinin həcmi 33 faiz artıb
07 iyun 2010 12:30 (UTC +04:00)

Əhalinin əmanətlərinin həcmi 33 faiz artıb

2010-cu il may ayının 1-nə dövriyyədə olan pul kütləsinin həcmi 6347,7 milyon manat təşkil edib. Pul kütləsinin 4434,3 milyon manatı nağd pul vəsaitlərinin, 903,2 milyon manatı tələb edilənədək vəsaitlərin, 1010,2 milyon manatı isə müddətli depozitlərin payına düşüb.

Mərkəzi Bankın mətbuat xidmətindən bildiriblər ki, kredit təşkilatlarında yerləşdirilmiş depozit və əmanətlərin həcmi də artıb. Belə ki, 2010-cu il may ayının 1-nə depozit və əmanətlərin ümumi həcmi 4612,8 milyon manat təşkil edib. Bunun 2474,7 milyon manatı əhali tərəfindən yerləşdirilib ki, bu da ötən ilin müvafiq dövrü ilə müqayisədə 32,5 faiz çoxdur. Depozitlərin 2138,0 milyon manatı isə qeyri-maliyyə təşkilatlarının payına düşür.

2010-cu il mayın 1-nə banklara qoyulan əmanətlərin 1070,3 milyon manatı (43,2 faiz) manatla, 1404,4 milyon manatı (56,8 faiz) isə xarici valyuta ilə cəlb edilib.

Elxan SALAHOV
# 455

Oxşar yazılar