Tələbələr arasında ölkə çempionatının qalibləri müəyyənləşdi

Aprelin 29-da ali və orta ixtisas təhsili müəssisələrinin tələbələri arasında Futbol üzrə VII Respublika çempionatı başa çatıb.

Təhsil Nazirliyinin mətbuat xidmətindən Lent.az-a verilən xəbərə görə, final oyununda Bakı Dövlət Universiteti ilə Azərbaycan Dövlət Bədən Tərbiyəsi və İdman Akademiyasının (ADBTİA) komandaları qarşılaşıb.

Gərgin mübarizə şəraitində keçən oyun 2:1 hesabı ilə BDU-nin komandasının xeyrinə başa çatıb. ADBTİA-nın komandası ikinci, Azərbaycan Memarlıq və İnşaat Universitetinin komandası isə üçüncü yeri qazanıb.

Daha sonra komandalar kubok, medal və qiymətli hədiyyələrlə təltif olunublar. Həmçinin, çempionatda fərqlənən iştirakçılar 5 nominasiya üzrə qiymətləndirilib.

Çempionat Azərbaycan Tələbə Futbol Federasiyası İctimai Birliyinin (ATFF) 2016-2020-ci illər üzrə fəaliyyət planına əsasən, ATFF və Azərbaycan Futbol Federasiyası Assosiasiyasının təşkilatçılığı, Təhsil Nazirliyi, Gənclər və İdman Nazirliyi, Azərbaycan Sahə Futbol Federasiyasının dəstəyi ilə keçirilib.

FİFA-nın mövcud qaydaları əsasında keçirilən oyunlar AFFA-nın Hakimlər Komitəsi tərəfindən təsdiq edilmiş hakimlər heyəti tərəfindən idarə olunub.