Millimizdən asan qələbə

Bu gün qadın voleybolçular arasında dünya çempionatının III təsnifat mərhələsində II turun matçları keçirilib. Apasport.az saytının məlumatına görə, ikinci oyun günündə Azərbaycan millisi Estoniya yığması ilə qarşılaşıb.

İlk matçda İsrailə 3:1 hesabı ilə qalib gələn Faiq Qarayevin yetirmələri aşkar favoriti olduqları bu görüşü də qələbəylə başa vurub. Komandamız zəif rəqibi asanlıqla 3 setdə məğlub edib – 3:0.

Bakıda Voleybol Mərkəzində keçirilən J qrupunun digər matçında isə Serbiya İsrail voleybolçuları ilə görüşdə heç bir çətinlik çəkməyib – 3:0.

J qrupu
II tur
4 yanvar
Serbiya – İsrail - 3:0 (25:9, 25:12, 25:20)
Estoniya – Azərbaycan – 0:3 (17:25, 19:25, 13:25)

Serbiya	2	2	0	6-0	150-95	6
Azərbaycan	2	2	0	6-1	169-125	6
İsrail	2	0	2	1-6	117-169	0
Estoniya	2	0	2	0-6	103-150	0

Qeyd edək ki, sentyabrın 23-dən oktyabrın 12-nə kimi İtaliyada təşkil olunacaq mundiala Avropanın 5 seçmə qrupunun hər birindən ilk yerin sahibləri vəsiqə qazanacaq. İkinci yerlərdən isə yalnız ən yaxşı göstəricilərə malik 2 komanda buna nail olacaq.